近排啲商品輪流飆，除咗直接影響你畀錢買嘢外，有時都值得思考下，邊啲商品會影響邊一瓣生意。例如今朝見到新聞話小麥都有份飆，就會諗：咦，啲飲品食品製造業會唔會好大鑊？會幾快見到個後果？（同埋最重要嘅係：捉到佢路的話有冇得賺？）
呢個時候當然又到本人啲黐線嘢發作啦～ 即刻開個 Google Sheets 出嚟濫用下先…
胡思亂想之下，諗到以下嘅配對：
- 穀物 → 啤酒業
- 可可豆 → 糖果業
- 咖啡豆 → 咖啡店 🙄
- 活牛 → 扒房
好彩 S&P GSCI 旗下啲行業指數係任你 download 嘅啫，同埋寫 blog 唔係寫 paper，可以主觀地揀我有興趣睇嘅上市公司作研究對象（i.e. 攞嚟鳩玩）。於是我揀咗：
好喇，點玩好呢？一項值得解答而且答中咗可能賺到錢嘅課題就係：究竟行業相關指數只係反映緊行業當刻現況、定係有領先指標嘅作用？
喺以下嘅篇幅，我將會嘗試分辨，本人所揀選嘅指數同佢嘅相關行業上市公司，究竟係：
- 冇乜關係
- 有關係、而且係同步
- 有關係、而且指數有領先指標作用（← 最想搵到呢樣）
（大肆蹂躪完啲 spreadsheets 之後）以下呢幅圖係列出每一間公司 + 佢嘅相關指數嘅一系列散佈圖：
- 公司價格 vs. 同一日嘅指數價格
- 公司價格 vs. 7 日前嘅指數價格
- 公司價格 vs. 14 日前嘅指數價格
- 公司價格 vs. 28 日前嘅指數價格
- 公司價格 vs. 56 日前嘅指數價格
Plot 出嚟嘅結果係顯示：
- BUD：同穀物指數其實冇乜關係。可以話係特登做呢個結果出嚟作測試用途啦，因為穀物指數涵蓋嘅係小麥、粟米、大豆，其實同釀啤酒關係唔係咁強（但 BUD 旗下都有 Hoegaarden 麥啤嘅）；
- HSY：同可可指數開始見到一啲啲關係，但十分薄弱。而且係同一日對同一日嘅關係最強，然後將每日股價同 7、14、28、56 日前嘅相關指數比較，關係越嚟越弱。可能嘅解釋係：1. 其實整朱古力唔使用好多可可豆，所以關係係有但唔強；😆 2. 喺剩餘有嘅關係裏面，HSY 嘅投資者一早望實晒可可豆價格，有乜嘢變動都即日反映晒；
- SBUX：同咖啡豆指數嘅關係比 HSY + 可可豆強，是可以理解的。同埋一樣係由即日嘅指數落到去 7、14、28、56 日前嘅指數咁樣同 SBUX 比較，個關係越嚟越弱。鬼咩，書都出埋（If It’s Raining in Brazil, Buy Starbucks），通晒天啦～
- RUTH：最有趣嘅梗係擺壓軸。跟活牛指數嘅關係，雖然冇 SBUX + 咖啡豆咁強但係都差不遠。值得留意嘅係 14 天前嘅指數同 RUTH 股價嘅關係比即日指數更強烈，可能顯示活牛指數對 2 星期後嘅 RUTH 股價有預測作用。（本欄不構成投資建議 etc. etc.）
下圖係將 RUTH 同活牛指數喺時間線上一齊 plot 然後將指數向右移（即係用過去嘅指數同未來嘅股價嚟重疊）嘅效果。並冇「嘩！係喎！郁歪咗 14 日嗰下完全重疊喎！」咁戲劇性，但望望下都望得出似乎、睇落、好像、大概係用 14 日前嘅指數好似好啲…
關鍵問題來了！究竟用明朝嘅指數斬清朝嘅股，賺唔賺到錢？要嘗試驗證呢個問題，可以用歷史股價模擬返以下操作：
- 從 2019-03-04 起監察住 S&P GSCI Live Cattle 指數收市價；
- 何時買入 RUTH：每當指數出現連續 5 個交易日升市，就將升市開始當日定為 Day 0，由 Day 0 數 10 個交易日（即係 2 星期，我哋剛才發現關連最強烈嗰個間距），喺 Day 10 當日買入一股 RUTH；
- 何時賣出 RUTH：每當指數出現跌市，就將收跌前一日定為 Day 0，由 Day 0 數 10 個交易日，喺 Day 10 當日賣出一股 RUTH。
將呢組操作由 2019-03-04 一路運行到 2022-03-04，三年間總共買入又賣出過 13 股 RUTH，買入用咗 US$233.81、賣出攞返 US$240.14，賺咗 2.7%。牛扒都買唔起，冇乜肉食。😅
不過起碼都叫做到個 proof-of-concept，希望有日再搵到啲更加匹配嘅公司 + 指數組合。到時梗係靜靜雞 fat fat 啦，仲得閒寫 blog 咩。
（如果你問，點解成本升跟住股價係升嘅呢？因為我揀嚟睇呢幾間公司都係最叻轉嫁成本㗎嘛！轉嫁完仲賺多咗添！i.e. 點講都得 ✌️）
