上回講到，標普高盛活牛指數似乎對 RUTH 有領先作用。有讀者來鴻詢問（OK 其實係朋友傾偈時講咗句），咁對 Mr. Steak（8447 MS Concept）又有冇效呢？
好問題！因為要研究一種現象嘅真偽，最科學嘅方法莫過於反覆思考「假如係真，應該仲會有呢樣嗰樣影響」然後逐樣去驗證下。但你問一句，我搞咗半日。（OK 只係我自己手腳慢。）
但喺進入課題之前，首先要了解指數特質，同埋思考返用呢種特質嘅指數去同選定嘅公司比較是否公平。
標普高盛活牛指數所追蹤嘅，係 CME 活牛期貨，而 CME 活牛期貨合約交易，係用美國活牛。
所以第一件事係要睇返，究竟 MS Concept 本身嘅業務係咪真係咁依賴美國牛，會唔會例如係大部份澳洲同巴西、少部份美國咁呢？
翻查返佢嘅年報同公告… 係冇用嘅。咁我又唔係巴菲特（亦非畢彼特），冇得打畀佢 CEO 問㗎嘛。身為普通市民，能夠做嘅只有… 睇 menu。以下係節錄自 Mr. Steak 嘅晚市套餐主菜選項：
雖然冇準確嘅百份比，但都知道起碼要睇埋澳洲市場咁啦。好彩，澳洲有個 Eastern Young Cattle Indicator 係追蹤牛肉價格嘅。於是我哋可以好似上回咁樣，做返以下一系列嘅 scatter plot：
- 8447 價格 vs. 同一日、7 日前、14 日前、28 日前、56 日前嘅 S&P GSCI Live Cattle
- 8447 價格 vs. 同一日、7 日前、14 日前、28 日前、56 日前嘅 Eastern Young Cattle Indicator
你可能會話，喂，澳洲嗰個指數係咪用澳元㗎？（係。）會唔會兌返港元先至啱用呀？（試咗，兌唔兌冇乜影響，信我。）
Scatter plots 嘅關聯系數顯示：
- 從數值大小比較：8447 同美國牛價格嘅關係強烈過澳洲牛*；
- 從公司價格 vs. 即日 → 7 → 14 → 28 → 56 日前指數嘅關聯系數趨勢嚟睇：指數變動傾向於即時反映喺公司價格上，顯示 Mr. Steak 嘅投資者早已識得𥄫實牛肉供應嚟及時作出反應（正路吖）。
*必須承認：攞 GSCI 同 EYCI 拍埋比較，有個問題係澳洲放好多假，例如 2021 年聖誕係由 12 月 18 日到 1 月 11 日都冇交易。爽！但喺 missing data 偏多嘅情況下夾硬攞嚟 plot 係會拉低咗個關聯系數。
另外，睇啲 scatter plots 你可能會留意到，每一組都係大致斜向上咁形態，除咗中間有一堆散點揈咗向上。究竟係乜嘢嚟嘅呢？我揀咗 8447 vs. S&P GSCI Live Cattle 即日嗰個 plot 嚟分析：
- 首先，根據呢個 scatter plot 做返個 linear regression，就會得到條直線方程式；
- 根據呢條方程式，用活牛價格計返條直線所預測嘅 8447 股價；
- 將已知真正價格減返預測價格，就計到真正價格偏離預測幾多；
- 按照返每一日嚟 plot 返就見到邊啲日子偏離得緊要啲，如下圖：
寧寧舍舍見到淨係圈住咗嗰個 7-8 月嘅位，係偏差得最勁嘅。呢排發生緊乜事？睇返公司公告（今次終於有返啲用），原來開 AGM。至於點解開 AGM 前會飆一飆呢… 呢個恐怕真係要搵巴菲特去問下 8447 CEO 先問得出答案。
